【巴西足球品牌：Penalty Armador Neo 實測】
.
草地封咗，仲未實測到釘Boot，幸好平底Boot實測仲有啲存貨。話說阿靴早一兩年就拍咗段「東京裝備多」(可於「屎波裝備多」Youtube搵番)，除咗Umbro嘅袋鼠皮釘Boot，另外仲買咗對冷門嘅平底波Boot，佢就係Penalty嘅Armador Neo。Armador Neo已經係2018年嘅產物，雖然佢出產年份較舊，但係佢嘅設計一啲都唔輸蝕。
.
話說Penalty係一個巴西品牌，出產住唔同嘅足球裝備。晌較早年前去日本嘅時候，阿靴一直都有留意Penalty喱個品牌，因為佢嘅設計同用色都幾特別，而且拎上手仲幾輕身。而今次阿靴實測嘅平底波Boot，用色亦非常特別，鞋前身位置為黃色，後半身就係黃藍色合併嘅Pattern嚟。
.
講返Armador Neo，鞋面主要用上較薄嘅麂皮質料，鞋頭位置亦有磨砂質料，目的加強踢球球感同耐用度。鞋後身同鞋舌就用上網製質料。鞋踭位置微微凹下，用料同樣是網製。緩震層面上，Armador Neo亦用上Penalty嘅緩震科技，一塊全腳掌嘅緩震膠。鞋底用上常見生膠底，中間位置亦會有一個透氣口，非常細心。
.
於整個實測過程中，阿靴最滿意嘅係Armador Neo嘅舒適度。Armador Neo鞋頭較圓，闊度為中至闊腳，適合亞洲人常見腳型。此外，鞋身麂皮質料較薄同柔軟，網製質料亦令波Boot變得輕巧而且舒適，估唔到嘅係，鞋籠位置用嘅同樣係網製質料，Lockdown狀況屬於理想。另外，阿靴認為Armador Neo嘅鞋帶系統做得頗出色，著上波Boot，綁好鞋帶，波Boot就已經非常包腳。
.
盤扭係阿靴感到驚喜嘅位置，雖然Armador Neo緩震底較薄，不過因為佢係全腳掌緩震嘅狀況，緩震層面亦比預期中好；亦因為緩震質料較薄嘅關係，整對波Boot嘅重量大大減低。加上Armador Neo整對波Boot嘅用料上同樣傾向薄，輕巧，而且舒適，阿靴認為佢係一對靈活感較強嘅平底波Boot，亦帶來理想嘅盤球發揮。
.
Armador Neo帶來嘅球感亦不錯，鞋頭麂皮質料較薄，亦令波Boot變得貼腳，麂皮質料既能提升到唔少踢球同控球質感，較薄嘅設計亦令腳面更容易感受到觸球嘅質感。整體來講，Armador Neo於控球感屬於中上，控球也變得更為輕鬆。
.
短傳層面上，Armador Neo傳送路線屬於穩定，較薄嘅鞋身令傳送質感更強。長傳層面上，Armador Neo球感理想，但力量感則相對較弱，阿靴認為Armador Neo鞋型屬於偏闊嘅類別，喱點同阿靴嘅腳形不同，鞋頭位置亦會有較多空間，亦令長傳嘅力量感略為欠奉。
.
至於射門上，力量感仍然係較弱嘅位置，不過隨時間開鞋亦會有所改善。阿靴就反而幾滿意Armandor Neo帶來嘅腳內檔射門，麂皮質料提升到射門嘅摩擦力，令腳內檔射門變得更具弧度，也可以較輕鬆射往期望嘅位置。
.
總括來講，我會覺得Armador Neo係一對集球感及靈活嘅平底波Boot，造功亦相當仔細。鞋型上Armador Neo就屬於中至闊腳，Size就無偏大偏細，著返正常尺碼就啱啱好。
.
Penalty Armador Neo 實測報告：
盤球：●●●●◐
控球：●●●◐
短傳：●●●◐
長傳：●●●
射門：●●●
靈活：●●●●
避震：●●●◐
.
----------------------------------------------------
【屎波裝備多Instagram】Follow: instagram.com/hkfootballreview
【波Boot實測】Mizuno Morelai Indoor: https://youtu.be/U7jeJhERup0
【波Boot實測】白飯魚: https://youtu.be/-dbvs0_YgiY
Search